24.02.2017

Heidelberg Hajo!

Bütt von Felix Grädler, Stadtrat und Ehrensenator der KGP

Was bei uns jeds Johr an Fasching in Heidelberg geht
da bin ich imma widda am staune, wer do so alles auf de Bühne rumsteht
Nur eens des ging wohl e bissl verschütt
und des is die (lokal-) politische Bütt
Dabei gäbs doch wirklich genug Froge
bei denne sich die Leut mit de Politiker rumploge

Grad vor korzem hawwa ma mol widda gsehe
wie sich die Politiker in Heidelberg mit Entscheidunge quäle.
Denne Leud isses awa schon kloar
En Heidel is in Heidelberg net nur en Joahr
Obwohl manchmal gehts a hoppla hopp
un ä neues Thema steht dann uff da Agenda als TOP

Awwer beim Haushalt - des isch kei Vision
konnt man kaum erlewe aach nur ä Diskussion
beim Thema Flüchtling, da stehne ma zamme
bis uff ä kläns Grüppche - da werd’s mir Bange
die hawwe Angst un verdächtige jeden
genau wie da Trump - sogar de Schweden

Dabei ischs doch ganz ähfach die Lösung zu finne
man muss sie nur einfach mitänanna verbinne
Die Windrädder in Kerche wäre obsoled
wenn ma im Kerchemer Feld widda en See hawwe tät
und tät ma den Neckar dann do hi leide - ihr würd schaue
bräucht ma nach Neunheim wedda Straßenbahn noch Brücke baue
Ganz innovativ täte ma dann beginne
- unnerirdisch Strom zu gewinne

Statt Bettesteua für die Stadt
tät ma den teuer verkaufe für die Chinese auf Patton Barack
Der Betriebshof wär dann unner de Brick
und Bergheim wär völlig im neue Glick
Wege der Straßenbahn von Kerche über die Bahnstadt brauche ma nimmi streite
denn jeder könnt in’d Stadt mim Schiffle gleite
Die Stadt am Fluss wär in der Bahnstadt
für die Touriste wär’s ne tolle Kahnstadt

unn auch für de Kohlhof hab ich ä Idee
dort wärs doch ah für die Stadtverwaltung schää
Die wolle doch aa in der Karlstor ziehe
dort owee müsste sie a net vor de Altstadttouriste fliehe
unn wenn ma die Kulturleitlinie richtig verstehe
dann is doch klar, dass ma für PHV da Weg für Heidelberg21 gehe

Ach, ich hätt da noch einige Idee
aber da will ich erstmol die Kommitments sehe
Ich denk ma könnte wirklich viel erreiche
wenn ma noch mehr mit de Gedanke schweife
un dafür sin ma ja schließlich als Gemeinderät do
Darauf ein dreifaches - Heidelberg Hajo!